Menntamálaráðherra gleðst yfir athygli Sólskinsdrengs

„Þetta er flott mynd og frábært að hún sé að fá þessa athygli," segir Katrín Jakobsdóttir menntamálaráðherra um Sólskinsdreng, mynd Friðriks Þórs Friðrikssonar.

Eftir að Vísir greindi frá því í á mánudaginn að stórleikkonan Kate Winslet tæki þátt í hljóðsetningu myndarinnar á ensku og að myndin yrði sýnd á kvikmyndahátíðinni í Toronto í september hefur verið fjallað um hana í mörgum af helstu fjölmiðlum í heimi. Þar á meðal BBC og Reuters. Umræðan um Ísland hefur verið neikvæð í erlendum fjölmiðlum eftir bankahrunið og segist Katrín fagna því að breyting hafi orðið þar á.

„Ég er alveg á því á því að ef eitthvað hrundi ekki þá var það menningin og ímynd hennar erlendis. Og kvikmyndir eru náttúrlega hluti af því," segir Katrín. Hún segir nauðsynlegt að hlúa að því sem sé sannarlega í lagi í samfélaginu. „Og það er náttúrlega mjög gaman hvað íslensk menning hefur náð langt, bæði í kvikmyndunum og tónlistinni ekki síst," segir Katrín.

Katrín segir að hugsanlega hafi sú athygli sem Ísland hefur fengið vegna bankahrunsins vakið athygli á íslenskri menningu, þó að sú athygli sé ekki komin til af góðu. Hins vegar eigi íslenskir listamenn mestan heiður. Uppbygging þeirra hafi verið gríðarlega mikil á undanförnum árum.

Katrín mun fylgja Sólskinsdreng á kvikmyndahátíðina í Toronto í september.