Kate Winslet í mynd Friðriks Þórs

Breska stórleikkonan Kate Winslet mun taka að sér hlutverk móður Kela í heimildarmyndinni Sólskinsdrengnum sem kemur út með ensku tali í september næstkomandi.

Winslet mun sem sagt verða í hlutverki sögumanns í myndinni. Þetta staðfestir Friðrik Þór Friðriksson leikstjóri myndarinnar í samtali við Vísi. Friðrik segir að sú útgáfa af myndinni verði frumsýnd á kvikmyndahátíðinni í Toronto og verði fyrsta sýningin þann 12 september.

Sólskinsdrengurinn fjallar um Kela, sem er ellefu ára gamall og með hæsta stig einhverfu. Í myndinni heldur hann ásamt móður sinni til Bandaríkjanna, þar sem þau kynnast vísindamönnum á sviði einhverfu og meðferðar við henni. Þau kynnast jafnframt foreldrum einhverfra barna sem glíma við sama verkefni, að brjóta niður múrinn milli barnanna og umheimsins.

Varla þarf að fjölyrða um framlag Winslet til kvikmyndasögunnar en hún er þekktust fyrir hlutverk sitt í myndinni Titanic, þar sem hún lék á móti Leonardo DiCaprio.