Hugsanleg afsögn innanríkisráðherra Bretlands

Breskir miðlar greina frá því í dag að Jacqui Smith, innanríkisráðherra Bretlands, muni segja af sér á næstu dögum vegna enn eins hneykslismáls þingmanna breska þingsins er varðar óheimil útgjöld þeirra.

Vandræði vegna kostnaðarliða Jacqui hafa verið til umfjöllunar í breskum fjölmiðlum frá upphafi árs og niðurlæging hennar náði hámarki þegar greiðsla fyrir klámmyndaáhorf eiginmanns hennar var greidd úr vasa skattgreiðenda.

Daily Telegraph greinir ennfremur frá því að innanríkisráðherrann hafi gefið eiginmanni sínum fimmtíu þúsund króna iPhone, auk þess að kaupa þrjár dvd myndavélar að andvirði 300 þúsund króna sem einnig voru færðar til kostnaðar á ráðuneyti hennar.

Auka þessar fréttir enn á vandræði Gordon Brown, forsætisráðherra Bretlands, sem þykja þó ærin fyrir.