Innrásarinnar í Normandí minnst

Leiðtogar Frakklands, Bandaríkjanna og Bretlands voru viðstaddir minningarathöfn í Frakklandi í morgun, þegar þess var minnst að 65 ár eru liðin frá innrásinni í Normandí.

Minningarathöfnin var haldin við Omaha ströndina í Normandí. Á annað hundrað þúsund bandarískir, breskir og kanadískir hermenn gengu þar á land þann örlagaríka dag, 6. júní 1944, en alls tóku hermenn frá 11 löndum þátt í innrásinni. Mannfall var mikið. Rúmlega 11 þúsund liðsmenn innrásarhersins féllu eða særðust, um 9 þúsund Þjóðverjar. Hundruðir roskinna uppgjafarhermanna sem tóku þátt í innrásinni verða einnig viðstaddir minningarathöfnina.

Gordon Brown forsætisráðherra Bretlands og Karl Bretaprins voru meðal gesta við minningarathöfnina í morgun. Það vakti athygli í Bretlandi að drottningin sjálf fékk ekki formlegt boð. Barack Obama Bandaríkjaforseti og Nicolas Sarkozy Frakklandsforseti ræddu um heimskreppuna, Afganistan, Íran og frið í miðausturlöndum fyrir minningarathöfnina en að sögn fór vel á með Obama og konu hans Michelle og Sarkozy og konu hans.