Gunnar hættir sem bæjarstjóri: Kominn tími á kónginn

„Ég lagði það til á fundinum í gær með mínum flokksfélögum að það væri kominn tími á kónginn," segir Gunnar Birgisson sem fyrir skemmstu lauk fundi með Ómari Stefánssyni, bæjarfulltrúa Framsóknarmanna í Kópavogi og samstarfsfélaga Gunnars í meirihlutanum í Kópavogi. Niðurstaða þess fundar var sú að Gunnar hættir sem bæjarstjóri.

Gunnar sagði í samtali við fréttastofu að það ætti eftir að ganga frá því hvenær hann myndi láta af störfum. Aðspurður hvort hann væri sáttur við þessa niðurstöðu svaraði Gunnar: „Ég tek hagsmuni flokksins og bæjarbúa í Kópavogi fram yfir mína," segir Gunnar sem mun þó áfram starfa sem bæjarfulltrúi og verður eftir sem áður forystumaður flokksins í Kópavogi.

Aðspurður hvort að hann hafi átt frumkvæði að því að hætta sjálfur segir hann það hafa verið kröfu Framsóknarsflokksins að hann léti af störfum. Flokksbræður hans í Kópavogi hafi hinsvegar lýst yfir eindregnum stuðningi við hann og hans störf. „Það var mikill stuðningur við mig á þessum fundi í gærkvöldi. Það var svo sett í hendurnar á okkur bæjarfulltrúunum að leiða þetta mál til lykta," segir Gunnar.

Hann segir að það sé ekki búið að finna eftirmann hans í starf bæjarstjóra. Aðspurður hvort það yrði Gunnsteinn Sigurðsson eða Ármann Kr. Ólafsson líkt og rætt hefur verið um svaraði hann: „Ég segi ekkert."