Strangasta skyndibitalöggjöf í Bandaríkjunum

Yfirvöld í Massachusetts hafa löngum verið hrifin af boðum og bönnum og má það ef til vill til sanns vegar færa að þar sé fleira bannað en leyft. Húðflúrstofur eru bannaðar í ríkinu, enginn getur keypt svo mikið sem glas af appelsínusafa á vínveitingastað nema vera 21 árs gamall og nýjasta skrautfjöður regluverks Massachusetts eru ströngustu reglur um matseðla á skyndibitastöðum sem þekkjast í Bandaríkjunum.

Upplýsingarnar á matseðlum allra veitingahúsa sem reka 20 eða fleiri staði undir sama nafni verða frá 1. nóvember 2010 að ná til hitaeiningafjölda hvers einasta réttar sem þar er boðið upp á og gildir það jafnt um matseðla inni á staðnum og þá sem birtir eru viðskiptavinum sem koma að bílalúgu.

Vænta má töluverðrar vinnu við þetta þar sem reglurnar ná til 5.800 veitingastaða í 50 mismunandi skyndibitakeðjum. Og hvað kemur til? Jú, meira en helmingur fullorðinna íbúa Massachusetts er of feitur og nú á að upplýsa fólkið um óhollustuna sem það úðar í sig svo það geti að minnsta kosti tekið upplýsta ákvörðun um að vera feitt. Nýju lögin hafa hlotið ákaflega lýsandi viðurnefni, mjóu lögin eða the Lean Act.