Samkomulagið veitir ríkissjóði skjól í sjö ár

Ríkisstjórnin telur að 33 til 170 milljarðar gætu fallið á ríkissjóð eftir sjö ár vegna Icesave skuldbindinga í Bretlandi og Hollandi sem samtals eru upp á 660 milljarða króna. Leiðtogar stjórnarflokkanna segja mikilvægt að samkomulagið skapi ríkissjóði algert skjól í sjö ár en á þeim tíma eru lán vegna Icesave afborgunarlaus.

Forsætisráðherra og fjármálaráðherra kynntu samkomulag Íslendinga við Breta og Hollendinga á fréttamannafundi síðdegis. Í samkomulaginu er lagt til grundvallar að eignir Landsbankans standi á næstu sjö árum undir 75 prósentum af Icesave skuldbindingunum. Það þýðir að 170 milljarðar gætu fallið á ríkissjóð að þeim tíma liðnum.

Breskir endurskoðendur telja hins vegar að eignir bankans standi undir allt að 95 prósentum af skuldbindingum en þá myndu 33 milljarðar falla á ríkið að sjö árum liðnum. En hver sem talan verður yrði hún greidd á átta árum þaðan í frá. Þá er ekki tekið tillit til vaxta sem eru 5,5 prósent og leiðtogar stjórnarflokkanna segja með þeim bestu sem í boði séu. Þá verða hryðjuverkalögin og frystingu eigna Landsbankans aflétt hinn 15. júní.



Mun ekki hafa áhrif á lánshæfismat ríkissjóðs

Steingrímur J. Sigfússon fjármálaráðherra segir að þetta samkomulag muni ekki hafa nein áhrif á lánshæfismat ríkissjóðs og stöðu hans næstu sjö árin. Það komi sér vel á þeim erfiðu tímum sem nú séu.

Þetta er vegna þess að það er Tryggingasjóður innstæðueigenda gefur út skuldabréfið og ábyrgð ríkissjóðs á því tekur ekki gildi fyrr en árið 2016.

Steingrímur segir að samkomulagið muni ekki hafa áhrif á gengi krónunnar. Hins vegar muni skuldbinding Íslendinga lækka ef og þegar gengið styrkist. Margir telja að Íslendingar hefðu átt að neita að borga og láta reyna á átt dómstólaleiðina.

Ísland hefði líklega tapað fyrir dómstólum



Jóhanna Sigurðardóttir forsætisráðherra segir að halda verði til haga að Íslendingar hafi verið einir um þá skoðun að þeim bæri ekki að standa við þessar skuldbindingar vegna kerfishruns. Það sé því líklegt að Íslendingar hefðu tapað slíku máli fyrir dómstólum.

Steingrímur segir að Íslendingar hefðu átt fáa skoðanabræður í því hvort þeir ættu einhvern annan möguleika í stöðunni, en semja við Breta og Hollendinga um niðurstöðuna.



Samkomulagið kynnt á Alþingi eftir helgi

Niðurstaðan verður kynnt Alþingi með skýrslu á mánudag og Alþingi þarf að lokum að samþykkja ríkisábyrgð vegna samningsins. Leiðtogar stjórnarflokkanna telja að þingmenn beggja flokka muni greiða götu málsins í þinginu.

„Ég held að þetta séu ágætis samningar miðað við þá stöðu sem við vorum í ef við horfum á þetta í heild," sagði Jóhanna. Það væri afar mikilvægt að ekki þurfi að greiða af lánunum í sjö ár þegar þjóðin verði búin að rétta úr kútnum.

Nú þegar eru til 50 milljarðar króna í sjóðum Landsbankans sem strax fara til afborgunar á skuldbindingunum.