Sigmundur Davíð: Íslendingar seldir í ánauð

Formaður Framsóknarflokksins segir að verið sé að selja Íslendinga í ánauð með samkomulagi sem undirritað var í nótt um Icesave skuldbindingarnar svokölluðu. Hann segir samninginn vera ógn við sjálfstæði Íslands. „Þetta er rosalegt. Ég er búinn að vera hálfmiður minn frá því að þetta var kynnt í gærmorgun," segir formaðurinn.

Samkomulag Íslands við Bretland og Holland vegna um Icesave reikningana var undirritað í nótt. Samkvæmt því munu Bretar aflétta hryðjuverkalögunum 15. júní og þá mun Tryggingasjóður innstæðueigenda ábyrgjast innstæður eigenda reikningana upp að því lágmarki sem tilskipun Evrópusambandsins gerir ráð fyrir. Samkvæmt því ábyrgist sjóðurinn 650 milljarða íslenskra króna vegna Icesave í löndunum tveimur.



Afleitt samkomulag

Sigmundur Davíð Gunnlaugsson, formaður Framsóknarflokksins, segir samkomulagið algerlega afleitt og margt í því óskiljanlegt. „Þetta er fullkominn viðsnúningur hjá fjármálaráðherra miðað við það sem hann sagði nokkrum dögum áður en hann tók sæti í ríkisstjórn."

Þá gerir Sigmundur alvarlegar athugasemdir við að skuldbindingar Íslendinga séu í erlendri mynt. „Það er verið að reikna þessar skuldbindingar út frá gengi Seðlabankans sem er á vissan hátt niðurgreitt gengi en það er ekki eins og að íslenska ríkið geti keypt pundið á því gengi."

Ógn við sjálfstæði Íslands

Flokksformaðurinn segir Íslendinga taka alla áhættuna með samningunum við Breta og Hollendinga. „Það er allt annað fyrir ríki að vera skuldbundið í eigin mynt heldur en að vera skuldbundið í mynt annars ríkis. Þannig að samkomulagið er í rauninni ógn við sjálfstæðið."

Að lokum bendir Sigmundur á að Alþingi á eftir að staðfesta og samþykja samkomulagið. Hann býst við átökum um málið.. „Það eru engar líkur á öðru en á að það verði tekist á um þetta í þinginu."