12 milljónir króna á fjölskyldu

Höfuðstóll Icesave lánsins að viðbættum vöxtum myndi duga til að reka Háskóla Íslands í heila öld og sjö árum betur. Deilt niður á fjölskyldur landsins nemur upphæðin tólf milljónum króna á hverja vísitölufjölskyldu.

660 milljarðar króna eru miklir peningar. En alls óvíst er hver kostnaður þjóðfélagsins verður af Icesave láninu þegar upp verður staðið. Stór hluti af eignum Landsbankans munu vera lán til fyrirtækja í Evrópu og Bandaríkjunum, samkvæmt heimildum fréttastofu, sem gefi af sér reglulegar tekjur á næstu árum. Þegar sagt er að menn geri sér vonir um að eignir bankans dugi fyrir 75% af Icesave láninu, er búið að reikna með vaxtagreiðslum, afföllum og hugsanlegri ávöxtun eigna á næstu 7 árum. Engu að síður er gagnlegt eftir talnaþoku vetrarins að glöggva sig á þeim upphæðum sem um ræðir.

Ef ekkert verður greitt af Icesave láninu í 7 ár - eins og samningurinn leyfir - yrði upphæðin á núverandi gengi og virði komin í 960 milljarða króna að þeim árum liðnum. Deilt niður á fjölskyldur í landinu jafngildir sú upphæð 12 millljónum króna á hverja fjögurra manna fjölskyldu. Rétt er að taka fram að því fer fjarri að samkomulagið feli í sér að fjölskyldur Íslands séu að bæta á sig tólf milljóna króna skuld, hér er eingöngu verið að setja tölur í samhengi.

960 milljarðar króna er það sem þyrfti á núvirði til að reka Landspítalann í nærri þrjá áratugi og hægt væri að reka elstu háskólastofnun landsins í heila öld og sjö árum betur fyrir þessa upphæð. En þótt samneyslan kosti sitt - þá voru svona upphæðir ekki stjarnfræðilegar í augum útrásarmanna góðærisins. Einn þeirra, einstaklingurinn Hannes Smárason, fyrrverandi forstjóri FL Group, skuldar eftir því sem best er vitað - 45 milljarða króna, sem er rétt um 7% af þessum 660 milljörðum króna sem Tryggingasjóður innistæðueigenda gekkst í ábyrgð fyrir í gærkvöld.