Obama vill Kúbu inn úr kuldanum

Breska blaðið The Guardian segir að Barack Obama ætli að nota ráðstefnu Ameríkuríkja sem haldin verður í vor til þess að draga Kúbu inn úr kuldanum.

John F. Kennedy forseti setti viðskiptabann á Kúbu í febrúar árið 1962 eftir að Fidel Castro gerði upptækar eigur Bandaríkjamanna á eyjunni. Það hefur verið í gildi æ síðan.

The Guardian segir að meðal annars verði ferðahömlum aflétt og hækkuð sú upphæð sem bandarískir kúbverjar geta sent fjölskyldum sínum.

Þeir peningar eru líflína hundruða þúsunda fjölskyldna á Kúbu. Þá verður einnig hætt að krefjast þess að Kúba borgi fyrirfram fyrir alla matvöru sem keypt er frá Bandaríkjunum.

Vestrænn diplomat á Kúbu segir að þessar og aðrar fyrirhugaðar breytingar muni hafa umtalsverð áhrif á líf almennra Kúbverja og bæta hag þeirra verulega.

Ekki þarf þó að búast við að samskipti landanna verði eðlileg alveg á næstunni. Kúba er heitt pólitískt mál í Bandaríkjunum og hefur verið undanfarin 46 ár.

Fræg eru orð Wayne Smith sem um tíma veitti forstöðu skrifstofu sem gætti hagsmuna Bandaríkjanna í Havana.

Hann sagði; „Kúba hefur sömu áhrif á ríkisstjórn Bandaríkjanna og full tungl hefur á varúlfa."