Nýr fyrirvari til að tryggja samþykki Breta og Hollendinga

Tryggja á að Hollendingar og Bretar fallist á fyrirvara við ríkisábyrgð á Icesave reikiningum Landsbankans, með nýjum fyrirvara við Icesave frumvarpið. Fjárlaganefnd vinnur að þessu á fundi sem nú stendur. Nefndarmenn reikna með því að málið verði afgreitt frá nefndinni í dag.

Frumvarp um ríkisábyrgð vegna Icesave reikninga Landsbankans hefur farið í gegnum tvær umræður á Alþingi, en var vísað aftur til fjárlaganefndar eftir aðra umræðu. Þrjár umræður þarf til þess að þetta verði að lögum.

Fundur nefndarinnar stendur enn, en samkvæmt heimildum fréttastofu innan af fundinum er gert ráð fyrir því að málið verði afgreitt úr nefndinni í dag. Þá herma heimildir fréttastofunnar jafnframt að nefndinn vinni að gerð nýs fyrirvara við Icesave frumvarpið. Málið snýst um lántöku tryggingastjóðs innistæðueigenda og fjárfesta. Hann fær í reynd lánið frá Hollendingum og Bretum, sem ríkisábyrgðin gildir fyrir. Skrifa á undir lánasamninginn á morgun.

Fyrirvarinn sem nú er ræddur, gengur, eftir því sem næst verður komist, út á að við lántökuna fallist bæði Hollendingar og Breta á alla fyrirvara sem Alþingi hefur gert við að íslenskir skattgreiðendur ábyrgist lánið.