Nýskráningar ökutækja sjöfalt færri en árið 2006

Nýskráningar innfluttra ökutækja, notaðra og nýrra, er tæplega sjöfalt minni fyrstu sex mánuði ársins 2009 en á sama tíma árið 2006. Árið 2009 hafa nýskráningar verið 2.819 fram til júlí en á sama tímabili voru þær 18.276 árið 2006. Þetta er um 85 prósenta minnkun. Frá bankahruni hafa þær verið um þrjú þúsund. Í hugtakinu ökutæki eru öll skráð ökutæki, allt frá vélsleðum til vörubíla.

„Það er auðvitað algjört hrun á þessum markaði og sýnir í sjálfu sér efnahagsástandið í hnotskurn," segir Runólfur Ólafsson, framkvæmdastjóri Félags íslenskra bifreiðaeigenda. Þó segir hann þetta sýna aðlögunarhæfni hjá almenningi að draga svona hratt úr neyslu.

„Þetta mun hins vegar skapa vandamál til lengri tíma af því að bílaflotinn mun eldast hratt og það gæti komið tímabil þar sem þyrfti að endurnýja bíla í miklu magni."

Runólfur segir þó að það hafi komið smá kippur í sölu nýrra bifreiða en júnímánuður var sá bjartasti frá því í júlí á síðasta ári. Þetta gæti skýrst af útsölum hjá umboðum sem og skráningum á bílaleigubílum, að sögn Runólfs.

„Ef árið myndi halda svona áfram verður innan við þrjú þúsund bíla sala á nýjum fólksbílum á árinu og við þyrftum að fara áratugi aftur í tímann til að sjá sambærilegar tölur," segir Runólfur en þegar hafa einungis um 1.500 nýir bílar verið nýskráðir það sem af er ári.

Eigendaskipti hafa ekki dregist jafnmikið saman og nýskráningar. Þannig hafa verið tæplega 37 þúsund skráð eigendaskipti það sem af er ári en voru tæplega 51 þúsund árið 2006. Þetta er því um 28 prósenta minnkun.

Ástæða þess að eigendaskipti dragast minna saman en nýskráningar er að fólk er í ríkara mæli að kaupa notaðar bifreiðar af hvert öðru í stað nýrra bifreiða af umboðunum, samkvæmt upplýsingum frá Umferðarstofu.

vidirp@frettabladid.is