Vítisenglar sagðir nota geðsjúka í skítverkin

Vélhjólasamtökin Vítisenglar í Danmörku eru sögð beita andlega vanheilu fólki fyrir sig til að fremja gróf ofbeldisverk. Það er danska Ekstra blaðið sem segist hafa heimildir fyrir þessu en Englarnir taka áburðinum síður en svo þegjandi og hljóðalaust og segir Jørn Jønke Nielsen, einn valdamesti maður Vítisenglanna í Danmörku, að þetta séu hrein og klár ósannindi.

Ekstra blaðið segir samtökin velja andlega veikt fólk í skítverkin þar sem gjarnan sé svo ástatt fyrir því, að það víli engan veginn fyrir sér að fremja grófustu ofbeldisverk og skilji hvorki afleiðingar verknaðar síns né geri nokkurn greinarmun á réttu og röngu, eða sé í besta falli alveg sama um þann mun.

Nielsen telur fólskulega vegið að samtökunum með þessum ásökunum og segir þær hreinlega út í hött. Blaðið ber hins vegar Thomas nokkkurn Kudahl fyrir frétt sinni en hann á og rekur meðferðarstofu fyrir geðsjúka í Hjørring og segist vita um fleiri en eitt og fleiri en tvö tilfelli þar sem sjúklingar hans hafi verið fengnir til að fremja ódæði fyrir vélhjólasamtökin.