Tógómenn ætla að nota Adebayor á móti Kamerún

Forráðamenn landsliðs Tógó í knattspyrnu segja að Emmanuel Adebayor, leikmaður Arsenal, sé leikfær fyrir leik Tógó á móti Kamerún í undankeppni HM á laugardaginn.

Emmanuel Adebayor hefur ekki spilað með Arsenal-liðinu síðan 8. febrúar þar sem hann tognaði á læri í leik á móti Tottenham. Hann æfði með öðrum landsliðsmönnum Tógó í dag og það komu 4000 manns til að horfa á æfinguna.

„Adebayor er ekki kominn hingað til að horfa á. Hann mun spila á móti Kamerún og verður fyrirliði liðsins eins og hann er vanur," sagði forráðamaður Tógo-liðsins eftir æfingu í kvöld.

Landslið Tógó fær ekki að leika þennan heimaleik í Tógo heldur verða þeir að spila á móti Kamerún í nágrannaríkinu Ghana. Tógó er í heimaleikjabanni eftir að óeirðir brutust út eftir 0-2 tap á móti Malí í október 2007.