Framleiðandi Carry On-myndanna látinn

Peter Rogers, framleiðandi bresku Carry On-myndanna, er látinn, 95 ára að aldri. Rogers framleiddi allar myndirnar en þær urðu 31 þegar upp var staðið og voru gerðar á árunum 1958 - 1978 auk einnar árið 1992.

Fyrsta myndin var Carry On Sergeant en svo hófst þessi mikla fjöldaframleiðsla við Pinewood-myndverin sem íslenskt sjónvarp og kvikmyndahús fóru ekki varhluta af en nokkrar myndanna voru sýndar hér á landi.

Carry On-myndirnar áttu það sameiginlegt að vera ódýrar gamanmyndir sem að jafnaði tóku fyrir einhvern dæmigerðan þátt bresks samfélags og gerðu stólpagrín að. Leikarateymið var að meginuppistöðu til það sama í öllum myndunum og má fullyrða að margur Íslendingurinn, sem kominn er af barnsaldri, kannist mætavel við þau Barböru Windsor, Sid James, Leslie Phillips og Kenneth Williams.

Peter Rogers var einhver annálaðasti vinnuhestur sem menn höfðu kynnst hjá Pinewood og var enn við störf þegar hann lést, 95 ára gamall. Einn samstarfsmanna hans lét þau orð falla að krafturinn hefði verið slíkur að menn hefðu allt eins búist við að Rogers yrði við störf fram að 200 ára aldri.