Dýrkar van Damme

Verðandi leiðtogi Norður-Kóreu elskar hraðskreiða bíla og Jean Claude Van Damme. Kim Jong-il, leiðtogi landsins, hefur látið í ljós þá ósk sína að sonur hans, Kim Jong Un taki sæti hans þegar hann er allur.

Suðurkóreskir fjölmiðlar greindu frá þessu í morgun en engin staðfesting hefur borist frá nágrönnunum í norðri. Kim Jong Un er talinn vera um 26 ára gamall en hann er yngsti sonur leiðtogans sem á þrjá syni. Stjórnmálaskýrendur telja kjarnorkuvopnabrölti Norður-Kóreumanna upp á síðkastið einkum hafa verið ætlað að sýna þau heljartök sem Kim Jong-il hefur á ríki sínu og þar með auðvelda honum að kveða upp úrskurð um það hver leysi hann af hólmi án þess að því verði mótmælt. Leiðtoginn er talinn heilsuveill og staðfest er að hann hafi fengið heilablóðfall í fyrra. Lítið sem ekkert er vitað um soninn og eina ljósmyndin sem fjölmiðlar eiga í fórum sínum af honum var tekin af honum á barnsaldri.

Sögusagnir herma að hann hafi hlotið menntun í einkaskóla í Sviss og er sagt að hann hafi áhuga á kvikmyndum, hraðskreiðum bílum og skíðaíþróttum. Þá segja suður-kóreskir miðlar að Jong Un haldi mikið upp á belgísku hasarmyndahetjuna Jean Claude van Damme.