Kjörsókn Evrópuþingkosninga aldrei minni

Kjörsókn kosninga til Evrópuþingsins, sem lauk í gær, var rúmlega 43 prósent og hefur aldrei verið minni. Í kosningunum árið 2004 var hún 45,5 prósent. Eva Joly, fyrrverandi rannsóknardómari í Frakklandi, segir í samtali við norsku fréttastofuna NTB að ljóst sé að hún hafi náð kjöri á þingið og jafnvel sé hugsanlegt að flokkur hennar, Europe Ecologie, hafi náð tveimur mönnum inn. Breski Verkamannaflokkurinn galt hins vegar afhroð í kosningunum og hlaut 16 prósent atkvæða. Nokkurrar sveiflu til hægri gætti í kosningunum auk þess sem öfgaflokkar, meðal annars í Hollandi og Svíþjóð, fengu fulltrúa sína kjörna á þingið.