Múslimar ósáttir við reykingabann

Múslimar í Indónesíu eru æfir yfir trúarlögum sem æðstuprestar þar í landi settu um helgina á reykingar. Ulema-ráðið, æðsta trúarráð landsins setti fatwa-lög sem banna reykingar barna og þungaðra kvenna og reykingar á opinberum stöðum.

Fatwa eru ekki eiginleg lög, en mikill þrýstingur er á trúaða að fylgja þeim því að öðrum kosti eru þeir syndugir. Almenningur í landinu er því ekki hress með bannið. Viðmælendur Reuters fréttastofunnar voru æfir, og sögðu reykingar ekki mál trúarleiðtoga. Veraldleg yfirvöld væru fullfær um að sinna þessum málum.

Það hafa þau þó ekki verið. Reykingar á opinberum stöðum hafa verið bannaðar um nokkurt skeið í stærri borgum Indónesíu, en fáir virða þau lög.

Heilbrigðisyfirvöld fagna banninu, en benda á að yfirvöld þurfi að gera meira ef að eitthvað á að draga úr reykingum í landinu, sem er fimmti stærsti markaður heims fyrir tóbak. Reykingar eru óvíða ódýrari en í Indónesíu, þar sem pakkinn kostar um 120 krónur, auk þess sem landið er frægt fyrir sterkilmandi negulsígarettur.

Tóbaksframleiðendur eru eðli málsins samkvæmt ekki ánægðir með bannið. Milljónir manna starfa við tóbaksiðnaðinn í Indónesíu, sem veltir um átta milljörðum dollara á ári. Um tíu prósent af tekjum ríkisins koma frá skattlagningu á tóbak. Fjármálaráðherra landsins telur að dregið gæti úr sígarettuframleiðslu um 5-10 prósent á árinu.