Drap fyrrverandi og dóttur hennar

61 árs gamall íbúi í Nesøya skammt frá Osló í Noregi skaut fyrrum eiginkonu sína (59 ára) og dóttur hennar til bana rétt áður en hann tók sitt eigið líf. Skotárásin átti sér stað rétt fyrir klukkan 18:00 í dag. Það er Aftenposten sem heldur þessu fram í kvöld.

Lögreglumaðurinn Per Zimmer sagði við fjölmiðla í kvöld að önnur konan sem féll hafi verið nátengd byssumanninum en vildi ekki staðfesta að þetta hefðu verið fyrrum eiginkona hans og dóttir hennar.

Vitni að árásinni segja að konan og dóttir hennar hafi látið lífið þegar þær reyndu að flýja frá manninum en þær fengu mörg skot úr riffli í sig.

Samkvæmt heimildum blaðsins hafa rifrildi verið daglegt brauð síðustu árin eftir að konan sótti um skilnað.