Herforingjastjórn Búrma sleppir pólitískum föngum

Herforingjastjórnin í Búrma hefur ákveðið að sleppa hluta af pólitískum föngum sínum en alls eru rétt rúmlega tvö þúsund manns í fangelsum þar í landi vegna stjórnarandstöðu sinnar.

Föngunum verður sleppt til þess að þeir geti tekið þátt í kosningum í Búrma sem verða árið 2010. Aðgerð herforingjastjórnarinnar má þakka heimsókn Ban Ki-Moon, aðalritari Sameinuðu þjóðanna en hann var í opinberri heimsókn þar í landi fyrir um viku síðan.

Heimsókn hans komst í heimsfréttirnar þegar herforingjastjórnin meinaði honum að hitta frægasta stjórnarandstæðing landsins, Aung San Suun Kyi. Hún sætir nú leynilegum réttarhöldum eftir að bandarískur maður synti til hennar þar sem hún var í haldi í stofufangelsi.

Ekki er ljóst hversu mörgum stjórnarandstæðingum verður sleppt en það þykir ólíklegt að Suun Kyi verði einn þeirra.