Svínaflensan hægir á sér í Mexíkó

Svínaflensan, H1N1, leggst á færra fólk en búist var við í upphafi og mun líklega ekki draga fleiri en hundrað manns til dauða í Mexíkó. Þetta segir Jose Angel Cordova heilbrigðisráðherra landsins nú í kvöld. Cordova segir Reuters fréttaveitunni að spítalar í landinu hafi séð stöðugt færri tilfelli af flensunni á síðustu dögum.

Mexíkó hefur staðfest 60 tilfelli látinna af völdum flensunnar, sem hefur breiðst út um allan heim, en þau tilfelli sem talið er að bætist við þessa tölu eru sögð vera þeir sem eru þegar mjög alvarlega veikir á sjúkrahúsum.

Næstum þrjátíu prósent af þeim sem hafa látið lífið þjáðust af sykursýki og aukaverkunum af offitu segir Cordova.