Cahill valinn í landsliðið

Gary Cahill hefur verið valinn í enska landsliðið eftir að þeir John Terry og Wes Brown meiddust lítillega á æfingu.

Þeir æfðu hvorugir í morgun og því ákvað Fabio Capello landslðsþjálfari Englands að bæta Cahill í hópinn.

Fram kemur þó á heimasíðu enska knattspyrnusambandsins að það séu vonir bundnar við að þeir Terry og Brown verði fljótir að jafna sig. Þess má svo geta að Rio Ferdinand, varnarmaður hjá Manchester United, er ekki í landsliðshópnum vegna meiðsla.

Cahill var síðast í landsliðshópi Englands sem mætti Kasakstan og Andorra í júní síðastliðnum.

England mætir Slóveníu á laugardaginn en um vináttulandsleik er að ræða. Á miðvikudaginn næsta mætast svo England og Króatía í undankeppni HM 2010.