Líklegt að Darling verði látinn fjúka

Gordon Brown segir að hann muni ekki láta af embætti forsætisráðherra Bretlands þótt stjórn hans sé rúin trausti. Hins vegar er líklegt að Alastair Darling fjármálaráðherra verði látinn fjúka.

Útlit er fyrir að í kosningum til Evrópuþingsins síðar í vikunni falli Verkamannaflokkurinn niður í þriðja sæti á eftir Íhaldsflokknum og Frjálslyndum demokrötum.

Það yrði í fyrsta skipti í tuttugu ár sem hann fer niður fyrir Frjálslynda. Í skoðanakönnun sem Daily Telegraph birti í gær ætluðu aðeins 17 prósent að kjósa Verkamannaflokkinn. Íhaldsmenn voru samkvæmt könnuninni með 29 prósent atkvæða og Frjálslyndir demokratar með tuttugu prósent.

Þetta hríðfallandi fylgi má auðvitað rekja að einhverju leyti til kreppunnar. Aðallega er það þó vegna uppljóstrana Daily Telegraph um ótæplega sjálftöku þingmanna úr opinberum sjóðum. Raunar á það við þingmenn úr öllum flokkum en Verkamennirnir hafa reynst hvað djarftækastir á almannafé. Og þar sem þeir eru í ríkisstjórn hefur ábyrgðin verið lögð þyngra á þeirra herðar. Gordon Brown forsætisráðherra er þó ekkert á þeim buxunum að gefast upp.

Hann sagði í samtali við BBC að það væri hans verk að greiða úr flækjunni, bæði að rétta Bretland af í kreppunni og að yfirhala stjórnkerfið.

Hinsvegar er búist við að hann stokki upp í ríkisstjórninni á næstu dögum. Þá þykir nokkuð víst að Alastair Darling fjármálaráðherra verði látinn víkja.

Bæði er það vegna ábyrgðar hans á fjármálaöngþveitinu og eins hefur komið í ljós að hann hefur verið óspar á að rukka hlunnindi.