Barnslík fannst í bakpoka

Maður og kona fundust látin á Englandi í gærkvöldi en talið er að þau hafi framið sjálfsmorð með því að stökkva fram af háum kletti í Eastbourne, East Sussex. Bifreið sem talin er hafa verið í eigu þeirra fannst á klettabrúninni. Lögreglumaður sem kom að fólkinu sá að tveir bakpokar lágu í seilingarfjarlægð frá líkunum. Hann opnaði annan bakpokann og sá þá eitthvað sem hann hélt að væri höfuð af dúkku. Þegar hann gáði betur kom í ljós að þetta var höfuð af litlum dreng sem var inni í bakpokanum.

Lík drengsins uppgötvaðist ekki fyrr en í morgun þegar unnið var að því að rannsaka vettvang. Lögregla rannsakar nú hvort fólkið hafi framið sjálfsmorð en miklar líkur eru taldar á að svo sé.

Stuart McNab lögreglumaður kom á vettvang:

„Ég var kallaður á vettvang í gærkvöldi en ákvað að klára þetta í morgun.Reynslan segir okkur að þeir sem falla þarna niður, á þessum stað, lifi ekki af. Við komum síðan á staðinn klukkan átta í morgun og ég hélt að það yrði formsatriði að klára þetta. Ég fór sjálfur niður klettinn og bar strax kennsl á konu og mann," segir Stuart.

„Ég leit lauslega í kringum mig og tók eftir tveimur bakpokum. Þeir voru báðir lokaðir og voru skammt frá líkunum. Ég opnaði annan þeirra og leit inn í hann þar sem ég sá það sem ég hélt að væri höfuð af dúkku. Þegar ég skoðaði það betur áttaði ég mig á að þetta var höfuð af litlu barni. Í hinum bakpokanum voru leikföng, traktor og bangsar."

Stuart segir að á þessum stað hafi nokkrir svipt sig lífi á undanförnum árum en það sé yfirleitt eldra fólk. „Það eina sem er sambærilegt þessu er atvik sem gerðist fyrir um tuttugu árum síðan. Þá keyrði einhver fram af klettinum með barn um borð í bílnum."

Það er Daily Mail sem segir frá þessu í dag.