Kínverjar óttast Al-Qaeda vegna kynþáttaóeirða

Kínversk yfirvöld eru áhyggjufull eftir að hryðjuverkasamtökin Al-Qaeda hótaði að hefna grimmilega fyrir þá Uighura-Kínverja sem hafa fallið í kynþáttaátökum á milli þeirra og Han-Kínverja í borginni Urumqi.

Tæplega fimmtíu Uighura-Kínverjar hafa látist í átökunum og um 150 Han-Kínverjar. Uighura-Kínverjar eru í miklum minnihluta í Kína en þeir eru um tíu milljónir að sögn kínverskra yfirvalda. Að auki eru þeir Múslimar.

Nú hafa boð borist í gegnum heimasíður sem taldar eru tilheyra Al-Qaeda þar sem þeir hóta að ráðast á þá 50 þúsund Kínverja sem eru að störfum í Norður-Afríku.

Í einum póstinum var því hótað að hryðjuverkamenn myndu afhöfða Kínverjana á vinnustöðum sínum eða á heimilum þeirra til þess að koma kínverskum yfirvöldum í skilning um að ekki væri hægt að hneppa múslima í þrældóm.

Kínversk yfirvöld hafa brugðist ókvæða við en þeir hafa fengið að starfa nær algjörlega í friði frá hermdarverkum hryðjuverkamanna hvar sem er í heiminum þar til nú.

Talsmaður kínversku ríkisstjórnarinnar biður aðrar þjóðir og hryðjuverkamenn að sýna afstöðu ríkisstjórnarinnar skilning. Þeir hafi ekki stundað þjóðarmorð eins og fram hefur verið haldið. Þá neita þeir því að herinn hafi gengið harkalega fram.

Þá segir talsmaðurinn að yfirvöld hafi þvert á móti leyft þjóðarbrotinu að blómstra í friði. Til þess að rökstyðja þá fullyrðingu segir hann að Uighura-Kínverjar hafi verið þrjár milljónir árið 1949, nú, sextíu árum síðar, eru þeir tíu milljónir.