NASA eyddi upprunalegum tungltökum

Bandaríska geimferðastofnunin játar að upprunalegum upptökum af lendingunni á tunglinu í júlí 1969 hafi verið eytt fyrir mistök.

Núna eftir helgi verða rétt 40 ár liðin frá því að þeir félagar Neil Armstrong og Buzz Aldrin stigu fæti á tunglið á meðan félagi þeirra Michael Collins sveimaði á sporbaug fyrir ofan þá. Þetta var auðvitað allt tekið upp á myndband eins og tíðkast þegar stór skref eru tekin fyrir mannkynið en þegar farið var að leita að þessum gömlu upptökum í gagnageymslum NASA árið 2006 gripu menn í tómt.

Þegar var tekið til við að rannsaka málið og nú er botn kominn í það. Góðu fréttirnar eru þær að vitað er hvað varð um upptökurnar. Slæmu fréttirnar eru á hinn bóginn þær að upptökur af fyrstu tungllendingunni eru á meðal 200.000 annarra upptaka sem voru þurrkaðar út svo hægt væri að nota spólurnar á nýjan leik. Allt í sparnaðarskyni auðvitað.

Að sjálfsögðu eru þó til varaeintök og nú hefur NASA beitt stafrænni tækni til að hressa svo vel upp á eitt þeirra að það er mun betra en frumeintakið var nokkurn tímann. En það var nú samt sjálft frumeintakið sem var þurrkað út. Richard Nafzger hjá NASA segir þetta auðvitað til vansa og að stofnunin þurfi helst að koma sér upp sagnfræðingi sem gangi milli manna og bendi á að engu skipti hvort nota eigi gögnin, þau hafi sagnfræðilegt gildi og slíkt eigi að passa upp á takk fyrir.