Bankamenn ráðnir til stærðfræðikennslu í New Jersey

Yfirvöld í New Jersey bjóða nú atvinnulausum bankamönnum vinnu þar sem reynsla þeirra úr viðskiptalífinu nýtist ágætlega.

Ríkisháskólinn í Montclair í New Jersey hefur hleypt af stokkunum átaki sem gengur undir heitinu kaupsýslumenn í kennslustofuna eða Traders to Teachers. Eins og nafnið gefur til kynna felur þetta í sér að fyrrverandi verðbréfagúrúar og bankamenn, sem áður undu hag sínum vel á Wall Street, en hafa nú verið án atvinnu síðan í haust, eru ráðnir sem stærðfræðikennarar við háskólann og nokkra menntaskóla í New Jersey.

Ekki stóð á áhuganum þegar átakið var kynnt og streymdu 146 umsóknir um 25 stöður þegar inn. Þeir umsækjendur eru nú í viðtölum og þeir sem ráðnir verða fara svo í þriggja mánaða kennaraþjálfun og hefja störf í haust. Bandarískum skólum veitir ekki af öflugum kennurum á þessu sviði þar sem nemendur þar í landi eru mjög aftarlega á merinni meðal vestrænna landa í stærðfræði og lestri auk þess sem hlutfall nemenda sem hætta í menntaskóla er með því hæsta þar.