Vill tvöfalda þjóðaratkvæðagreiðslu

Birgitta Jónsdóttir, þingflokksformaður Borgarahreyfingarinnar, telur að Íslendingar muni ekki fá neina sérmeðferð í aðildarviðræðum við Evrópusambandið. Hún vill að fram fari tvöföld þjóðaratkvæðagreiðsla um hugsanlega aðild Íslands að ESB.

Umræður um aðildarumsókn að Evrópusambandinu fóru fram á Alþingi í dag en þeim lauk á þriðja tímanum. Fjölmargir þingmenn tóku til máls í umræðunum í dag, þar á meðal var Birgitta. Næsti fundur Alþingis er klukkan þrjú á mánudag, en nú eru enn 17 manns á mælendaskrá.

Kostnaðarsamar viðræður

Birgitta fullyrti í ræðu sinni að aðildarviðræður við ESB muni kosta þjóðarbúið gríðarlega fjármuni á sama tíma og krafist er niðurskurðar.

„Því meira sem ég hef hugleitt þetta ferli, því sannfærðari er ég um að það er algerlega ábyrgðarlaust og sínir umheiminum enn og aftur að hér býr þjóð sem er ekki fær um að axla ábyrgð eða taka afdráttalausar ákvarðanir. Við erum semsagt að fara að ganga til aðildarviðræðna án þess að vilja ganga í ESB. Hvaða rugl er það? Annað hvort sækir maður um aðild og er á leiðinni í ESB eða maður sækir ekki um aðild," sagði þingflokksformaðurinn.



Aðildarviðræður þýðir að við viljum ganga í ESB

Birgitta segir að við munum ekki fá neina sérmeðferð. Það hefur aldrei verið gerður neinn sérdíll um sjávarútvegsmál hjá ESB og það yrði með sanni alveg stórmerkilegt ef svo yrði og alveg öruggt að eitthvað annað héngi á spýtunni."

Að sækja um aðild hlýtur að þýða að við viljum gagna í Evrópusambandið, að mati Birgittu.

„Þar eð ég hef ekki umboð frá mínum kjósendum til að taka slíka ákvörðun mun ég styðja tvöfalda þjóðaratkvæðagreiðslu sem hægt væri að stefna saman eigi síðar en í kringum upphaf haustþings."