Ekki útilokað að búið verða sækja um ESB-aðild í næstu viku

Ekki er útilokað að Íslendingar verði búnir að sækja um aðild að Evrópusambandinu fyrir lok næstu viku að mati utanríkisráðherra. Þingsályktunartillaga um aðildarumsókn fer í síðari umræðu á Alþingi á morgun en sjálfstæðismenn ætla að óbreyttu að greiða atkvæði gegn tillögunni.

Utanríkismálanefnd Alþingis afgreiddi tillöguna úr nefnd eftir átakfund í morgun. Guðfríður Lilja Grétarsdóttir, þingmaður Vinstri grænna, gerði athugasemdir við álit meirihluta en skrifaði að lokum undir með fyrirvara. Vill hún líkt og sjálfstæðismenn að boðað verði til þjóðaratkvæðagreiðslu um hvort ganga skuli til viðræðna.

Framsóknarmenn skiluðu einnig séráliti en þeir vilja að sett séu skýr skilyrði fyrir inngöngu íslands í sambandið.

Málið kemur til kasta Alþingis á morgun en væntanlega fer atkvæðagreiðsla ekki fram fyrr en á mánudag.

„Við munum greiða atkvæði gegn tillögunni eins og hún lítur út núna vegna þess að hún uppfyllir ekki þau skilyrði sem við erum að setja," segir Þorgerður Katrín Gunnarsdóttir aðspurð hvort sjálfstæðismenn greiði atkvæði gegn tillögunni eða komi til meða að sitja hjá.

Fulltrúi borgarahreyfingarinnar í utanríkismálanefnd, Birgitta Jónsdóttir, skrifaði einnig undir meirihlutaálit nefndarinnar með fyrirvara.

„Ég vil bara setja fyrirvara til þess að ef að það kæmu breytingartillögur sem ég vildi styðja þá vil ég passa upp á að ég sé ekki komin alveg inni í horn," segir Birgitta.

Vinstir grænir eru þó klofnir í sinni afstöðu.

„Þetta er mjög umdeilt mál og skiptar skoðanir í flestum ef ekki ölllum flokkum þannig að það þarf ekki að koma neinum á óvart að það gæti verið tvísýnt með það hvernig málinu reiðir af hér og í hvaða formi það verður og svo framvegis," segir Steingrímur J. Sigfrússon, fjármálaráðherra.

Utanríkisráðherra telur fullvíst að tillagan verði samþykkt á Alþingi. Aðspurður hvort hægt sé að fullyrða að við verðum búin að sækja um aðild formlega fyrir lok næstu viku svaraði Össur. „Ég er búinn að vera svo lengi í pólitík að ég fullyrði ekki neitt. fyrr en það er í hendi. en ég vona það."