Óvíst með afstöðu þingmanna Framsóknarflokksins

Líklegt er að að meirihluti þingflokks Framsóknarflokksins greiði annað hvort atkvæði gegn aðildarumsókn að Evrópusambandinu eða sitji hjá við atkvæðagreiðsluna. Umræðum um aðildarumsóknina var framhaldið á Alþingi í morgun.

Sigmundur Davíð Gunnlaugsson formaður Framsóknarflokksins sagði í fréttum okkar í gær að hann myndi ekki greiða atkvæði með tillögu um umsókn Íslands að Evrópusambandinu ef ekki næðust fram breytingar á tillögunni.

„Ég myndi vilja sjá breytingar í þá veru að það væri hnykkt á því að um raunveruleg skilyrði væri að ræða hvað varðar hagsmunina," segir Sigmundur Davíð. Svo fólk tryði því og treysti að menn muni standa vörð um þá og ekki gefa eftir vissa grundvallarþætti. Á því hafi samþykkt flokksþing Framsóknarflokksins byggt og hann vildi sjá menn færa sig nær því sjónarmiði.

Tveir þingmenn Framsóknarflokksins, þau Guðmundur Steingrímsson og Siv Friðleifsdóttir, lýstu því yfir á Alþingi í gær að þau teldu að skilyrðum flokksþings Framsóknarflokksins fyrir aðildarumsókn væri fullnægt í tillögu og nefndaráliti meirihluta utanríkismálanefndar og að þau myndu greiða tillögunni atkvæði sitt.

„Eins og menn muna kannski úr umræðunni frá því þetta var fyrst samþykkt var það grundvallaratriði að þetta væru skilyrði að hálfu flokksþings. Sumir töldu það reyndar vera það óaðgengileg skilyrði að Framsókn væri í raun og veru ekki hlynnt aðild að Evrópusambandinu," segir Sigmundur Davíð. Aðrir hafi talið skilyrðin mjög aðgengileg. En það væri alveg á hreinu að hans mati að um raunveruleg skilyrði væri að ræða og heilmikil umræða hafi farið fram um þessi mál á flokksþinginu.

Vigdís Hauksdóttir þingmaður Framsóknarflokksins lagði í gær fram breytingartillögu við þingsályktunina eins og hún lítur út í meirihlutaáliti utanríkismálanefndar. Hún leggur bæði til breytingar á tillögunni sjálfri og nefndarálitinu. Sjaldgæft er að texta í tillögugrein sé breytt mikið í síðari umræðu um þingsályktunartillögur og því verður að teljast ólíklegt að breytingin nái fram að ganga.

Síðari umræða um aðildarumsóknina hófst um hádegi í gær og stóð fram undir miðnætti og hófst aftur klukkan hálf ellefu í morgun. Tuttugu þingmenn eru á mælendaskrá og ekki víst að umræðum ljúki í dag, en forsætisráðherra sagði í fréttum okkar í gær, að hún vonaðist til að hægt yrði að greiða atkvæði um málið á mánudag.

Samkvæmt heimildum fréttastofu eru fimm til sjö af níu þingmönnum Framsóknarflokksins á móti aðildarumsókn á forsendum meirihlutans, en tveir hafa lýst yfir stuðningi sínum eins og áður sagði.