Norsku morðin vegna deilna um eignir

Norskur maður myrti í gær fyrrverandi eiginkonu sína og dóttur hennar í smábæ rétt utan við Osló.

Norska blaðið Aftenposten segir að maðurinn og konan hafi átt í hatrammri skilnaðardeilu, meðal annars um skiptingu eigna.

Maðurinn var sextíu og eins árs, eiginkonan fimmtíu og níu ára og dóttir hennar fjörutíu og eins.

Til stóð að selja hús þeirra og konan var þar ásamt dóttur sinni að taka til í garðinum áður en væntanlegir kaupendur kæmu til þess að skoða það.

Maðurinn kom á vettvang vopnaður riffli. Mæðgurnar reyndu að flýja en maðurinn elti þær og skaut þær mörgum skotum. Hann fór síðan heim til sín og svipti sig lífi.

Margir sjónarvottar voru að þessu, meðal annars börn sem voru í píanótíma í nágrannahúsi.

Lögreglan hefur staðfest að haglabyssa hafi verið gerð upptæk hjá manninum í mars síðastliðnum.

Hann er sagður hafa verið verið í mikilli geðshræringu vegna skilnaðarins og meðal annar sagt við nágranna sinn að ef konan gæfi ekki eftir í deilunni um eignir ætti hún á hættu að vera skotin.

Aftenposten segir að lögreglan hafi nokkrum sinnum haft afskipti af þessu máli vegna hótana mannsins.

Við morðin notaði hann óskráðan riffil sem ekki er vitað hvar hann fékk.