Ráðuneytismenn fá námskeið í uppistandi

Líf japanskra embættismanna er allt annað en hlægilegt þessa dagana og liggur stjórnarandstaðan þeim meðal annars á hálsi fyrir að sóa fé skattborgaranna ráðleysislega á krepputímum.

Það kemur þó ekki í veg fyrir að ráðuneyti samgöngumála í Japan geri sitt til að létta mönnum lífið á tímum erfiðleika og býður ráðuneytið nú starfsfólki sínu upp á námskeið í uppistandi, það er að segja þeirri list að flytja gamanmál á sviði og hafa þannig ofan af fyrir meðbræðrum sínum og -systrum.

Það eru þaulvanir skemmtikraftar sem annast kennsluna og hafa rúmlega 100 starfsmenn ráðuneytisins slegið til og skellt sér á námskeiðið. Þetta er þó ekki allt gert eingöngu með glens og grín í huga heldur er hugmyndin meðal annars sú að auka færni fólksins til að hafa samskipti við almenning en japanskir embættismenn verða seint taldir meðal hressasta fólks í heimi.

Þessu vill Atsuya Kawada, starfsmannastjóri ráðuneytisins, breyta og segir þessa nálgun mun heppilegri en þá að senda fólkið á langa og leiðinlega fyrirlestra um opinbera stjórnsýslu, vinnudagurinn sé nú þegar nógu langur og nú þurfi japönsk möppudýr á skopskyni að halda í stað skrifræðis.