Drogba hent úr hópnum

Enskir fjölmiðlar fullyrða í dag að Didier Drogba verði ekki í leikmannahópi Chelsea sem mætir Southend í síðari leik liðanna í ensku bikarkeppninni í kvöld.

Luiz Felipe Scolari sagði í gær að nú þyrftu leikmenn að standa saman og herða sig á erfiðum tímum. Liðið tapaði fyrir Manchester United, 3-0, um helgina og hefur aðeins unnið þrjá af síðustu ellefu leikjum í öllum keppnum.

Svo virðist sem að Drogba sé fyrsta fórnarlambið í áherslubreytingum Scolari en óneitanlega hefur Drogba oft staðið sig betur en á þessari leiktíð.

Nicolas Anelka verður samkvæmt þessu í byrjunarliði Chelsea í kvöld en hann er enn markahæsti leikmaður ensku úrvalsdeildarinnar þó svo að hann hafi ekki verið í byrjunarliðinu síðustu þrjá leiki.

„Ég hef skoðað marga leiki með Anelka og síðustu leiki með Drogba. Ég hef mína skoðun og læt hana í ljós á vellinum í hverjum leik," sagði Scolari við enska fjölmiðla.

„Allir leikmenn hafa fengið sín tækifæri. Ég hef gefið hverjum leikmanni að minnsta kosti fimm til sex leiki til að sanna sig."