Nýtt fjárhagsár Kaliforníu skuggalegt

Nýtt fjárhagsár hefst í Kaliforníu í dag og það ekki með neinum glæsibrag. Fjárlagahalli Kaliforníu nemur rúmum 24 milljörðum dollara auk þess sem atvinnuleysi og hríðlækkandi fasteignaverð hafa sett mark sitt á bókhaldið. Prófessor við Claremont McKenna-háskólann segir að ákaflega sársaukafullar aðgerðir muni þurfa til að draga ríkið upp úr feninu. Arnold Schwarzenegger ríkisstjóri vill niðurskurð og aftur niðurskurð en þó án skattahækkana. Demókratar heimta hins vegar hærri skatta en þeir hafa þingstyrk umfram repúblikana í Kaliforníu.