Merki heyrast frá flugritum Air France

Björgunaraðilar á vettvangi Air France-slyssins í Atlantshafi hafa nú numið merki frá flugritum vélarinnar, hinum svonefndu svörtu kössum. Franska dagblaðið Le Monde greindi frá þessu á vefsíðu sinni í morgun en talsmenn Air France vilja þó ekki staðfesta fregnirnar. Le Monde segir skip á vegum franska sjóhersins hafa numið dauft merki í gær og hafi ómannaður fjarstýrður kafbátur verið sendur niður á hafsbotn til að reyna að staðsetja flugritana en þeir gætu gefið veigamiklar vísbendingar um hvað hafi farið úrskeiðis áður en vélin hrapaði í sjóinn 1. júní síðastliðinn með 228 manns innanborðs.