Evrópa reynir að bjarga Aung San

Herforingjastjórnin í Burma er að reyna að fá Aung San Suu Kyi dæmda í fimm ára fangelsi til viðbótar vegna þess að bandarískum manni tókst að henni forspurðri að komast inn á heimili hennar.

Aung San hefur verið í stofufangelsi meira og minna síðan flokkur hennar vann stórsigur í kosningum í Burma fyrir nítján árum.

Herforingjastjórnin ógilti þær kosningar. Fangavist Aung San á að ljúka hinn tuttugasta og sjöunda þessa mánaðar.

Herforingjarnir krefjast þess að hún verði framlengd í fimm ár vegna heimsóknar Bandaríkjamannsins. Réttarhöld vegna þessa hafa staðið í fimm daga.

Ráðstefna Asíu- og Evrópuríkja hefst í Vietnam í næstu viku. Þar ætla utanríkisráðherrar Evrópuríkjanna að leggja að stjórnvöldum í Burma að blása réttarhöldin af.

Kínverjar hafa þegar lýst því yfir að Vesturlönd eigi að láta Burma í friði.

Burma og Kína undirrituðu í mars síðastliðnum samning um að leggja olíu- og gasleiðslu yfir landamæri ríkjanna.

Það mun stytta mjög flutningsleiðir Kínverja á þessum mikilvægu orkugjöfum sem þeir verða sífellt háðari.