Redknapp: Gomes var frábær

Harry Redknapp, stjóri Tottenham, lofaði frammistöðu markvarðarins Heurelho Gomes í sigri sinna manna á Chelsea um helgina.

Gomes átti stórleik er Tottenham vann 1-0 sigur á grönnum sínum í Chelsea. Hann kom til félagsins frá PSV Eindhoven í sumar og þótti heldur misjafn á milli stanganna fyrst um sinn.

„Það væri lygi ef ég hefði sagt að ég hefði búist við svona frammistöðu hjá honum þegar ég kom fyrst til félagsins," sagði Redknapp. „Ég hafði áhyggjur af honum þó svo að margir í Evrópu hefðu sagt mér hversu góður hann væri."

„Ég var hjá Portsmouth þegar Tottenham keypti hann og þá sagði Tony Adams mér að þeir höfðu einn besta markvörð heims," bætti Redknapp við en Adams hafði áður þjálfað í Hollandi og þekkti til Gomes.

„Þegar ég kom svo til Tottenham leit hann ekki út fyrir að falla í þann flokk en hann hefur verið frábær að undanförnu."