Steve Jobs fékk nýja lifur

Steve Jobs, yfirmaður Apple, þurfti á lifrarígræðslu að halda fyrir tveimur mánuðum ef marka má heimildir Wall Street Journal. Samkvæmt blaðinu mun Jobs snúa aftur til vinnu síðar í mánuðinum, en mun hugsanlega fara rólega af stað.

Jobs var einn af stofnendum Apple árið 1976, fór frá fyrirtækinu tæpum áratug síðar og varð síðan aftur yfirmaður þess um aldamótin. Hann lét af hefðbundnum stjórnunarstörfum þar fyrir um fimm mánuðum þegar hann tók sér veikindaleyfi vegna "hormóna ójafnvægis", en hann hafði léttst mikið árið 2008. Hann greindist með krabbamein í brisi árið 2004 en sigraðist á því.

Hingað til hafa fregnir af heilsufari Jobs haft talsverð áhrif á hlutabréfaverð fyrirtækisins.

Hvorki Jobs né talsmaður Apple hefur staðfest fregnir af lifrarígræðslunni.