Stefnir í metfjölda ferðamanna í ágúst

Salan erlendis frá stefnir í að vera 16 prósentum meiri í júlí og ágúst hjá Icelandair en á sama tíma í fyrra. „Þetta er mjög ánægjulegt í þessu árferði. Það stefnir í meiri fjölda en nokkru sinni fyrr á þessum tíma," segir Birkir Hólm Guðnason, framkvæmdastjóri Icelandair.

Þó salan sé svipuð í heildina og í fyrra er erlendi markaðurinn að vinna upp tapið sem kemur frá Íslandi, að sögn Birkis, enda hefur Icelandair verið mikið að vinna í erlenda markaðnum. „Eftir bankahrunið tókum við eiginlega allar auglýsingar út á Íslandi og settum á erlenda markaðinn."

Mest hefur fjölgun verið í sölu milli ára frá Frakklandi og talar Birkir um sprengingu í þeim efnum. Icelandair sér fram á 55 prósent aukningu þaðan í ágúst og er Frakklandsmarkaðurinn að fara fram úr þeim þýska „sem einhvern tímann hefði þótt saga til næsta bæjar," að sögn Birkis.

Ferðamönnum fækkaði um þrjú prósent í janúar til júní á þessu ári miðað við árið í fyrra, samkvæmt tölum frá Samtökum ferðaþjónustu. „Við skiljum ekki alveg þær tölur því við höfum verið að horfa upp á tíu til fimmtán prósent aukningu til landsins á þessu tímabili," segir Birkir.

Þó erfitt sé að meta fjölda bókana fram í tímann, því einhverjir panti flug á síðustu stundu, komi megnið af bókunum fjórum til tólf vikum fyrir brottför, að sögn Birkis. Einnig séu fá sæti laus í ágúst og því eigi þeir auðvelt með að meta þetta.

Þrátt fyrir velgengnina hefur Icelandair þurft að segja um 430 manns upp á síðustu 18 mánuðum, að sögn Birkis. Nú starfa um 1.200 hjá fyrirtækinu og er stefnt að því að halda sama flugframboði og á síðasta ári, að sögn Birkis, en nýverið fór Icelandair að fljúga til Seattle.

Matthías Imsland, forstjóri Iceland Express, segir gjörsamlega uppbókað framan af ágúst. Iceland Express dró áætlunarflug saman um 25 prósent í ágúst en eftir á að hyggja var það kannski of mikið, að mati Matthíasar. „Mikil aukning er á ferðamönnum í ágúst og fækkunin á Íslendingunum er ekki eins mikil og búist var við," segir Matthías sem segist hins vegar hafa áhyggjur af framhaldinu.

„Við höfum áhyggjur af vetrinum og hvernig ferðamenn skila sér hingað sumarið 2010," segir Matthías sem segir Iceland Express nánast einbeita sér eingöngu að erlenda markaðnum.