Skart rappara hríðfellur í verði

Harðnandi árferði gerir það að verkum að rapptónlistarmenn draga nú úr gullskreytingum sínum og bera jafnvel gerviskartgripi.

Ekki er allt gull sem glóir, segir gamalt og gott máltæki og það fá þeir félagar Curtis James Jackson og aðrir í rapptónlistarbransanum svo sannarlega að reyna á eigin skinni þessa dagana. Jackson þessi er reyndar betur þekktur undir heitinu 50 Cent og hefur marga fjöruna sopið í tónlistarbransanum en það verður að segjast eins og er að sjaldan hefur listamannsheitið 50 Cent, sem á gengi dagsins mætti útleggja 63 krónur, átt jafn-vel við.

Nú er nefnilega svo komið að mörg kíló af gulli og demöntum sem þessir piltar skreyta sig gjarnan með hafa mátt víkja fyrir ódýrari málmum, gullhúðuðu glingri og eftirlíkingum. Þeir dagar eru nefnilega liðnir, að minnsta kosti í bili, þegar menn völsuðu um með skart, sem slagaði hátt í fjárlög smáríkja, utan á sér og jafnvel tennur í stíl.

Rappstjörnuskartgripahönnuður, sem breska blaðið Guardian ræddi við og vildi reyndar ekki láta nafns síns getið, sagði að nú lækkaði karatatala gullsins hratt og sumir tónlistarmenn hefðu jafnvel dregið svo mjög úr gullkeðjum, hringum og öðru skarti að þeir gætu næstum því hreyft sig eðlilega. „Þetta er orðið dót í lægsta gæðaflokki sem er varla túskildings virði," sagði annar viðmælandi.