Yfirburðasigur hjá Congress

Congress-flokkurinn í Indlandi, með forsætisráðherrann Manmohan Singh í fararbroddi, bar sigur úr býtum í þingkosningum í landinu sem voru haldnar á laugardag. Sigurinn er einn sá öruggasti í Indlandi í tæpa tvo áratugi.

Sigur flokksins og um leið slæmt gengi indversku kommúnistaflokkanna þýðir að umbætur í trygginga- og lífeyrismálum ásamt banka- og verslunarmálum ná líkast til fram að ganga. Þrátt fyrir það telja sérfræðingar ólíklegt að frjálst markaðshagkerfi verði innleitt í landinu í bráð. Alþjóðafjármálakreppan hefur fyrst og fremst komið í veg fyrir það, enda halda Indverjar að sér höndunum þegar kemur að fjárfestingum erlendis. Ekki stendur heldur til að losa um reglugerðir tengdar fjárfestingum í nánustu framtíð. - fb