Erlendir miðlar áhugasamir um fall stjórnarinnar

Fjölmiðlar um allan heim hafa sagt frá falli íslensku ríkisstjórnarinnar.

Ísland er að hrynja forsætisráðherrann fer frá, segir í fyrirsögn í danska blaðinu BT.

Aðrir fjölmiðlar eru á svipuðum nótum. Talað er við ýmsa íslenska stjórnmálamenn og álitsgjafa.

Norska blaðið Aftenposten vitnar í Geir H. Haarde forsætisráðherra sem segir að stjórnmálakreppa myndi bætast ofan á efnahagskreppuna. Nú hafi það gerst og hann harmi það mjög.

Á vef breska sjónvarpsins BBC er gangur mála á Íslandi rakinn. Sagt að á síðasta ári hafi Ísland verið eitt ríkasta og hamingjusamasta land í heimi. Nú standi það eftir snautt og meira að segja án ríkisstjórnar.

Í danska blaðinu Berlingske Tidende segir að mikil gjá hafi verið á milli stjórnarflokkanna í Evrópumálum.

Margt bendi þó til þess að örlagavaldurinn í stjórnarslitunum hafi verið Davíð Oddsson seðlabankastjóri sem sé flokksbróðir Geirs Haarde. Geir hafi haldið hlífiskildi yfir honum en Samfylkingin lagt ofuráheslu á að víkja honum og öðrum seðlabankastjórum úr starfi.

Margir fjölmiðlar minnast á mótmælafundi og óeirðir sem hafi farið vaxandi dag frá degi. Að lokum hafi ríkisstjórnin ekki staðist þrýstinginn.