Ljóð eftir Bob Dylan 16 ára boðið upp

Handskrifað ljóð eftir Robert Zimmerman frá 1957 verður boðið upp hjá Christie's í New York í júní. Zimmerman þessi er vitaskuld betur þekktur undir nafninu Bob Dylan og samdi ljóðið, að því er talið er, 16 ára gamall meðan hann dvaldi í sumarbúðum gyðinga í Wisconsin. Ljóðið fjallar um dauða hunds nokkurs og var samið fyrir fréttablað sumarbúðanna. Ritstjóri blaðsins geymdi frumhandrit ljóðsins allan tímann, í 52 ár, en skilaði því nýverið aftur til búðanna sem nú hyggjast setja ljóðið á uppboð. Búist er við að allt að 15.000 dollarar fáist fyrir blaðið, jafnvirði um 1,9 milljóna króna.