Fimmtán féllu í mosku í Íran

Að minnsta kosti 15 manns biðu bana og meira en 50 særðust í sprengjuárás ódæðismanna á mosku í borginni Zahedan í suðausturhluta Írans í kvöld. Sprengja sprakk í moskunni þegar fjölmargir sjíta-múslimar voru þar við kvöldbænir.

Haft er eftir Ali Mohammad Azad, fylkisstjóra, að um hryðjuverkamenn hafi staðið á bak við árásina og að þeir hafi verið handteknir. Hann fullyrðir að ódæðismennirnir hafi ætlað að koma fleiri sprengjum fyrir á svæðinu.

Lögleysa er sögð hafa ríkt í landshlutanum um árabil eftir ítrekuð átök á milli lögreglu og eiturlyfjasmyglara.