Brown mun gjalda afhroð

Útlit er fyrir að Verkamannaflokkur Gordons Browns, forsætisráðherra Bretlands, gjaldi afhroð í næstu þingkosningum sem haldnar verða í síðasta lagi næsta vor.

Ný könnun sem gerð var fyrir Lundúnablaðið Times sýnir að Íhaldsmenn njóta stuðnings fjörutíu prósent kjósenda en Verkamannaflokkurinn fengi nærri helmingi minna fylgi væri kosið nú eða tuttugu og eitt prósent. Frjálslyndir demókratar eru ekki langt á eftir þeim með fimmtán prósenta fylgi. Talið er að útgjaldahneykslið sem skekið hefur Bretland síðustu vikur ráði miklu um.

Horft er af athygli til Evrópuþingskosninganna í næstu viku og jafnvel talið að þær ráði miklu um framtíð Browns í formannsembætti. Könnun Times sýnir að Verkamannaflokkurinn er þriðji stærsti flokkurinn þar á eftir Íhaldsmönnum og Breska Sjálfstæðisflokknum, flokki Evrópuandstæðinga.