Ekki sofa í vinnunni

Hlaðmaður hjá bandaríska flugfélaginu JetBlue vaknaði upp við vondan draum þegar hreyflar vélarinnar sem var að fara frá New York til Boston voru ræstir.

Hann hafði verið að hlaða töskum um borð í vélina og verið svo syfjaður að hann lagði sig í farangursrýminu. Dyrunum að farangursrýminu er læst utanfrá.

Öskur hans og barsmíðar heyrðust ekki vegna hávaðans frá hreyflunum. Sem betur fer er farangursrými flugvéla þrýstijafnað eins og farþegarýmið.

Hinn syfjaði hlaðmaður dó því ekki úr súrefnisskorti. Hinvegar lá við að starfsbróðir hans í Boston dæi úr hjartaslagi þegar hann opnaði farangursrýmið og starði framan í náfölt andlit.