Styttist í tunglárekstur

Núna eru örfáar klukkustundir í að tveggja tonna þungt toppstykki eldflaugar bandarísku geimvísindastofnunarinnar NASA skelli á tunglinu á 9.000 kílómetra hraða á klukkustund og þyrli upp rykskýi sem geimfarið L-Cross, eða Lunar Crater Observation and Sensing Satellite, mun svo mynda rétt áður en það flýgur í gegnum skýið og skellur sjálft á yfirborði tunglsins, þó ekki með sama krafti og fyrra skeytið. Stærri áreksturinn verður á botni gígsins Cabeusar á suðurpóli tunglsins en þangað hefur sólarljós aldrei náð. Ætlun NASA er að kanna hvort ís leynist á gígbotninum sem er þá fyrirheit um að vatn sé eða hafi verið þar. Það mun verða ljóst innan klukkustundar frá árekstrinum. Stjörnuskoðunarstöðvar í að minnsta kosti þremur löndum bjóða fólki að koma í heimsókn og fylgjast með árekstrinum sem verður vel sýnilegur um stjörnusjónauka á þeim landsvæðum þar sem myrkur verður enn klukkan hálftólf að íslenskum tíma.