Lenti á bjargsyllu eftir þrettán metra fall

Norskur maður má prísa sig sælan að vera á lífi eftir að hann féll fram af verönd á fjallakofa og lenti á bjargsyllu eftir 13 metra fall.

Slysið varð í Telemark í Noregi. Maðurinn sem er 29 ára gamall var gestkomandi þar og mun hafa verið eitthvað við skál. Hann rambaði fram og aftur um veröndina og kíkti fram af henni þar sem sá niður lóðrétt bjargið. Svo hallaði hann sér fram til að sjá betur. Og þá skipti engum togum að hann missti jafnvægið og féll framaf.

Niður voru mörghundruð metrar, en hann var svo heppinn að lenda á klettasyllu eftir 13 metra fall og lá þar hálf rotaður.

Ómögulegt reyndist að komast að honum með venjulegum hætti og var því sent eftir þyrlu frá norska flughernum sem náði honum um borð.

Hann var fluttur á sjúkrahús þar sem hann liggur nú. Líðan hans er stöðug.