Atvinnuleysisklúbbar spretta upp í Bandaríkjunum

Tom Skidmore í Kansas missti vinnuna í desember og er svo sem ekkert einn um það. Hann hefur hins vegar fyrir fimm manna fjölskyldu að sjá og er því ekkert á því að sitja með hendur í skauti.

Þess vegna skráði hann sig í eins konar klúbb atvinnulausra. Slíkir klúbbar hafa margþætt hlutverk. Þeir halda utan um hópefli atvinnulausra, eru félagsskapur, hafa allar klær úti við að krækja í vinnu handa félögum sínum og taka í sameiningu á tilfinningunni sem fylgir því að fá höfnunarbréf þegar sótt er um starf. Allt frekar uppbyggilegt enda hefur brúnin lyfst aðeins á Tom þótt hann sé enn atvinnulaus.

Atvinnuleysi hefur ekki verið meira í Bandaríkjunum síðan árið 1992 svo ekki er vanþörf á því að atvinnulausir hittist og fari yfir stöðuna í stað þess að híma hver í sínu horni. Ekki skemmir að félagsfræðingur við Kaliforníuháskóla segir allt benda til þess að slíkir klúbbar hjálpi mörgum við að komast í tengsl við vinnuveitendur sem eru að leita að fólki og veiti jafnvel góða undirstöðuþjálfun fyrir atvinnuviðtöl. Sem sagt, ekki hanga bara heima í kvíðakasti, það borgar sig aldrei.