Stálin stinn á milli stórveldanna

Obama Barrack, forseti Bandaríkjanna er kominn til Rússlands í opinbera heimsókn en þegar er komið babb í bátinn. Stuttu eftir að hann lenti bárust þær fregnir að mögulegt væri að Rússar myndu slíta viðræðum um kjarnorkuvopn.

Ástæðan er sú að Bandaríkjamenn hyggjast setja upp eldflaugavarnakerfi í mið-Evrópu en Rússland hefur ávallt verið á móti kerfinu.

Mikið er í húfi fyrir Bandaríkjamenn í heimsókninni en þeir vilja nýta sér leið í gegnum yfirráðasvæði Rússlands til þess að flytja vopn og birgðir til Afganistan.

Eina leiðin sem bandaríkjaher kemst nú er í gegnum Pakistan. Bílalestir sem fara þar um eru berskjaldaðar gagnvart árásum Talibana.

Til stóð að stóveldin tvö myndu skrifa undir samning um að losa sig við allt að helming af þeim kjarnorkuvopnum sem þeir eiga. Fundurinn mun standa yfir í tvo daga.

Þessar fregnir túlka stjórnmálaskýrendur sem kaldan viðsnúning Rússanna. Þó er tekið fram að þessar köldu viðtökur jafnist ekki á við þær sem Obama fékk árið 2005 þegar hann ásamt öðrum þingmönnum bandaríska þingsins voru handteknir og haldið föngnum í þrjá tíma í Rússlandi.

Þá voru vegabréfin þeirra einnig gerð upptæk.

Minnstu mátti muna að handtakan hefði orðið að meiriháttar milliríkjadeilu á milli Rússlands og Bandaríkjanna.